Hér allt sundurgrafið

Hér allt sundurgrafið
Sem er gott mál, enda verið að koma fyrir heitum pottum og taka inn hitaveitu í öll hús. Staðurinn er Munaðarnes á sólríkum “vordegi”. Framkvæmdum miðar vel og heitir pottar verða komnir í flest hús í sumar. Þetta mun breyta aðstöðunni verulega og ásókn í bústaði mun aukast að sama skapi. Sem sagt mikla breytingar og allar til batnaðar.

Auk þessa þá verður starfsrækt sérstök félagsmiðstöð fyrir börn og unglinga í þjónustumiðstöðunni í sumar. Tilraun varð gerð með starfsemi af þessu tagi í fyrrasumar og tókst hún með ágætum og því afráðið að halda starfinu áfram í sumar.

Munaðarnes, fínn kostur í orlofsmálum STH félaga

Starfsmatið komið í bæinn.

Starfsmatið komið í bæinn.
Í næstu viku fer starfsmatsvinna í gang. Búið er að taka út þau störf sem eiga að fara í viðtöl hjá okkur í Hafnarfirði og gert er ráð fyrir að viðtöl fari fram strax í næstu viku. Með þessu er verið að reka endapunkt á vinnuna sem hefur því miður dregist allt of lengi.

Tenging starfsmats við laun er næsta skref og það þarf ekki að taka langan tíma. Aðaltriðið er að starfsmatsgrunnurinn er komin og er gott gagnasafn yfir störf bæjarstarfsmanna innan SSB.
Lýsingar verða birtar á netinu í fyllingu tímans. Þar getur fólk borið saman lýsingu og sitt starf. Ef það passar illa þá er kæruréttur nýttur þannig að viðkomandi einstaklingur getur komið ábendingum sínum formlega á framfæri.

Já lífið er lotterí

Já lífið er lotterí
Hafnarfjarðarbær stendur fyrir launamiðalotterí um þessa mundir, veglegir vinningar segja menn og dregið verður úr "seldum miðum" 1. apríl.

Best væri auðvitað að laun væru í þeim gæðaflokki að hver mánaðarmót væru starfsfólki sú sanna gleði og sú sama og þess sem happdrættisvinning hlýtur. Þar sem því er ekki að skipta þá er það úrvalsleið að breyta rafrænum launaseðli í happdrættismiða. Og hitt væri ekki verra að happdrættið gilti fyrir alla, jafnt rafræna sem og pappírssinnaða launamenn.

Því er ekki að skipta og því ekki hægt að segja húrra fyrir jafnræðisreglunni í þetta skiptið hvað sem síðar kann að verða. Gullrætur allra landa sameinast í þessu snilldarúrræði og ég trúi ekki öðru en að allir sem vettlingi geta valdið nái sér í "miða".

Viðeigandi? - Mjög svo, segja sumir - afar sérstakt, segja aðrir. Eitt er þó víst, lífið er "lotterí" og Hafnarfjarðarbær tekur þátt í því.

Einar Emilsson - minningarorð

Einar Emilsson - minningarorð
Í dag er borin til grafar ágætur félagi minn og vinur, Einar Emilsson á Dalvík.
Einar var lengi formaður Starfsmannafélags Dalvíkur og sat einnig í stjórn BSRB.
Kjarasamningagerð er ekki það léttasta verk er fólk tekur að sér. Það er hins vegar eitt af meginverkefnum formanna verkalýðsfélaga. Sú mikla pressa og álag sem sú vinna hefur í för með sér leiðir óhjákvæmilega til þess að þeir sem við þetta vinna kynnast vel og betur en ella, því að á slíkum stundum koma mannkostir fólks í ljós. Einar bjó við ríkidæmi í þeim efnum og því ánægjulegt að vinna með honum á þessum vettvangi. Einar vann gott verk á sviði verkalýðsmála enda ötull baráttumaður sem kom mörgum góðum málum í höfn á þeim vettvangi. Með Einari er gengin drengur góður og votta ég Ingu og börnum þeirra sem og fjölskyldunni allri mína dýpstu samúð

Er STH á móti

Er STH á móti
hinni rafrænu byltingu - Nei . Er STH með athugasemdir vegna rafrænna launaseðla sem slíkra ? - Nei - Hvað er þá málið? - Framkvæmdin er klúður því ekki var leitað formlegs samþykkis viðkomandi starfsmanna - Þögn er ekki sama og samþykki - gríðarleg óánægja allnokkurra þeirra sem þetta vilja ekki og fengu enga launaseðla um mánaðarmótin eðlileg enda viðkomandi ekki óskað eftir neinum breytingum.

Hvað er til ráða ? - Senda fólki eyðublað þar sem óskað er eftir formlegu samþykki þess og málið dautt. Allir kátir - þeir sem vilja pappírinn fá hann, þeir sem vilja rafrænt fá það. Af hverju er verið að gera einföld mál flókin spyr sá sem ekki veit?

Ekki er blekið þornað á undirskrift kjarasamninga

Ekki er blekið þornað á undirskrift kjarasamninga
Þegar að spádeildir bankanna senda fulltrúa sína í fjölmiðlana og hefja gráturinn um að þessi verulega hóflegi samningur sé allt of hár? Kauphækkanir hjá okkur séu mun meiri nú en í nágranna- og samkeppnislöndunum, menn geta hins vegar í engu þeirrar laklegu launaþróunar hérlendis sem verið hefur um áratuga skeið og hvernig íslendingar sitja í engu við sama borð og nágrannaþjóðir okkar þegar að miða er við lífskjör eða kaupmátt.

Veit satt að segja ekki hvernig á bregðast við þessu eða hvort taka beri mark á þessu yfir höfðu. Sennilega skynsamlegast að flokka þetta undir hreinræktaðan hroka bankakerfisins sem á sem kunnugt er sennilega heimsmet í vaxtaokri og þjónustugjöldum.

Eitt er víst að samningar þessir eru greinilega mjög umdeildir og ekki útséð hvort þeir verða samþykktir hjá félögunum enda að margra mati ekki í neinu samræmi við þann gríðarlega gróða sem íslenskt atvinnulíf skilar eigendum sínum um þessar mundir.

Sakna Þjóðhagsstofnunar á tímum sem þessum og tel það mikil mistök að hún var lögð niður . Var vönduð stofnun og óháð og algerlega laus við hagsmunatengdar spár eins og spádeildir bankanna framkvæma. Að leggja niður þessa ágætu stofnun var svipaðs eðlis eins að henda öllum hitamælum á sjúkrastofnunum.

Hagsmunatengsl bankanna eru alger og augljós, sem sagt vanhæfi. Tekur einhver mark á rannsóknum tóbaksframleiðenda um áhrif tóbaksreykinga á heilsu fólks?
Tugir milljarða gróði bankakerfisins versus einverjir 5.000 kallar til fólks sem þegar hefur það skítt?

Að það valdi kollsteyptu nei , raskar sennilega eitthvað hlutabréfagróðanum og arðgreiðslum. En fjallar fyrst og fremst um á hvern veg á að skipta auðæfum þjóðarinnar. Sem sagt grjóthörð hagsmunagæsla og "spár" hagmunaaðila í því ljósi og út frá þeim hagsmunum. Flóknara en þetta er það nú ekki?

Tæplega 1100

Tæplega 1100
Hafnfirskir bæjarstarfsmenn gerðu sér dagmun í gærkveldi á Ásvöllum en þar fór árshátíð bæjarins fram. Hljómsveit Jóns Ólafssonar og gleðisveitin Randver voru meðal skemmtikrafta. Allt fór þetta ljómandi vel fram og ekki annað séð en að fólk hafi skemmt sér hið besta. Hef lengi haldið því fram að hafnfirskir bæjarstarfsmenn séu ávallt í fremstu röð bæði í starfi og leik.

Okkur berast kvartannir, mjög háværar og með réttu

Okkur berast kvartannir, mjög háværar og með réttu
Tilefnið rafrænir launaseðlar Hafnarfjarðarbæjar. Einhliða ákvörðun án formlegs og upplýsts samþykkis viðkomandi einstaklinga. "Ef þú lætur ekki vita þá ert þú samþykkur" segja menn en þetta stenst engan vegin og svona er einfaldlega ekki hægt að vinna. STH benti bæjaryfirvöldum á þessa annmarka fyrir nokkru án árangurs, eins og klúðrið um þessi mánaðarmót ber því miður vitni um

Hvert er auk þess öryggið varðandi rafræna launaseðla og eru persónuupplýsingar eins og samsetning launa á glámbekk í heimabönkum viðkomandi? Öruggt kerfi segja sumir en aðrir umdeilanlegt og margir í tölvubransanum eru fullir efasemda.
Réttur bæjaryfirvalda til að fara með upplýsingar af þessu tagi með þessu hætti er engin.

Lausn málsins er einföld snúa málinu við, biðja fólk afsökunar á því raski sem þetta hefur valdið þeim og senda út eyðublöð þar sem að þeir sem þetta vilja, geta sent launadeild undirskrifað formlegt plagg þar sem sérstaklega er farið fram á að launaseðlar séu sendir í heimabanka viðkomandi, sem sagt formleg samþykkt og ósk . Þögn er ekki sama og samþykki, hvorki í þessum málum né öðrum og bæjaryfirvöld geta einfaldlega ekki stillt málinu upp með þeim hætti.

Nýr sumarbústaður STH skammt frá Stykkishólmi

Nýr sumarbústaður STH skammt frá Stykkishólmi
Á föstudaginn var undirritaður kaupsamningur varðandi kaup STH á orlofshúsi við Stykkishólm. Húsið er allt hið vegalegasta, stórt og rúmgott , með pottum og öllum hugsanlegum búnaði. Húsið stendur á sjávarlóð og er eins og áður sagði skammt frá Stykkishólmi. Gert er ráð fyrir afhendingu á sumri komanda nánar tiltekið í byrjun júlí. Með þessu aukast orlofsmöguleikar félagsmanna STH enn frekar.

Fyrir á félagið Siggubæ í Biskupstungum, Bjarkarás í Skorradal, Casa de Arno á Spáni, Sjafnarbúð við Eiðavatn, Furulund á Akureyri og Albertslund í Munaðarnesi. Bátar félagsins er tveir: Í Skorradal, Haraldur l og á Eiðum, Haraldur ll, mikil aflaskip báðir tveir sérstaklega þó Haraldur ll

Fundur með skólariturum

Fundur með skólariturum
Hélt fund með skólariturum í Hafnarfirði í gær. Við fórum yfir helstu mál sem eru í deiglunni.m.a. um starfsheiti starfsmanna. Ljóst að skólaritarastörfin eru að þyngjast verulega og orðið löngu tímabært að breyta þeim starfsheitum í skrifstofustjórastarf. STH hefur haft verulegar athugasemdir við að skólaliðar séu í auknum mæli nýttir til skrifstofustarfa sem skólaritarar væru. ( nema hvað laun varðar )

Einkavæðing í Evrópu

Einkavæðing í Evrópu
Er sem sagt staddur í Luxemburg á tveggja daga fundi hjá EPSU. Á okkar ágæta máli myndi það útleggjast sem Fulltrúaráð Evrópskra bæjarstarfsmannafélaga. En í því sit ég fyrir hönd BSRB.
David Hall frá háskólanum í Greenwich hefur verið að fara yfir þróun þessara mála í Evrópu síðustu árin og margt merkilegt sem hann hefur komist að, m.a.:

Að samningum um einkavæðingu fylgir leynd sem gerir að verkum að almenningur hefur ekki sama aðgang að upplýsingum um t.d. hvernig staðið er að viðkomandi þjónustu. Þ.e.a.s. að almenn upplýsingaskylda gildir ekki þegar að búið er að bjóða út þjónustuna? sérkennilegt í meira lagi.

Að kostnaður og gæði fara saman og gæði eftir einkavæðingu séu betri en verið hefur er fjarri því að vera rétt. Mýmörg dæmi eru um hið gagnstæða, hins vegar eru stjórnmálamenn áfram um að lækka framlög og “spara”. Einkavæðing því sé oftast í raun leið til þessa að minnka raunverulegt þjónustustig og oft á tíðum verulega og spara með því einhverjar örfáar krónur sem þó séu ekki í nokkru samræmi hin raunverulega niðurskurð þjónustunnar.

Fleiri og fleiri dæmi koma upp þar sem samfélagið þarf að endurfjármagna og koma í gang einkavæddri samfélagsþjónustu sem farið hefur á hausinn. Sparnaður því til lengri tíma ákaflega lítill og oft rándýrt fyrir samfélagið, eins og dæmið um gjaldþrot.hinnar einkavæddu Vatnsveitu í Grenoble sýndi glögglega

Hall rannsakaði Farum málið í Danmörku, og eftir nokkrar tilraunir til þess að setja það mál í vísindalegt samhengi án nokkurs árangurs þá kemst hann að þeirri niðurstöðu ; sem er samt sem áður hávísindaleg; að allt sem laut að einkavæðingu í Farum byggði að (ofsa)trúarlegum forsendum fremur en útreikningum um gildi þess að einkavæða og þess vegna hafi nú farið eins og fór.

"Mange takk" eins og danskurinn segir

"Mange takk" eins og danskurinn segir
Þakka fólki öll þau jákvæðu viðbrögð og góðar kveðjur sem ég hef fengið vegna umræðna um áfengisauglýsingar í Kastljósi í gærkvöldi sem og vegna áskorunarinnar. Einn hafði þó samband og fannst afar ósanngjarnt að "ráðist" væri sérstaklega á eitt fyrirtæki.
Þeir sem ekki áttu kost á að fylgjast með umræðunum geta nálgast þáttinn hér

Áhrif auglýsinga
Hin ósanngjarna "árás" mín "á eitt fyrirtæki" sýnir í hnotskurn hve auglýsingatæknin er áhrifarík því að ef grannt er skoða þá er hvergi minnst á að sniðganga sérstaklega Egill Skallagrímsson fremur en aðra?
Staðhæfingarnar í auglýsingunni eru:
1. Sniðgöngum auglýstar áfengistegundir....
og síðar
2. ....sniðgöngum fyrirtæki sem þverbrjóta...

Spurning er ekki fullyrðing.
Ég velti hins vegar upp spurningunni hvort Ölgerð Egils Skallagrímssonar sé hafin yfir íslensk lög? Spurningu en ekki fullyrðing.
Boðskapurinn á því ekki síður við um þau fyrirtæki sem þverbrjóta lög um bann við áfengisauglýsingum. Spurningin sem slík er hins vegar fullkomlega réttlætanleg.
Ölgerðin hefur verið dæmd fyrir brot á lögum um bann við áfengisauglýsingum og þar sem fyrirtækið virðist ekki láta segjast, eins og flestar þær auglýsingar sem birst hafa á síðustu dögum bera vott um, þá er spurning um hvort fyrirtækið telji sig hafið yfir íslensk lög auðvitað í fullkomnu samhengi.

Hitt er einnig rétt að mörg fyrirtæki eiga skilið hinn óverðuga sess sem hinn óhressi viðmælandi minn taldi ómaklega veittur Agli Skallagrimssyni einum og sér. En það er önnur Ella.

Umræða um þessi mál víða
Ögmundur Jónasson heldur úti lifandi og góðri heimasíðu ogmundur.is . Ögmundur fjallar þessa daganna um áfengisauglýsingar og tekur dæmi um hvernig fyrirtækið Vífilfell beinir auglýsingum sínum til ungs fólks. Sjón er sögu ríkari sjá hér

Skýrari geta skilaboð ekki orðið!

Skýrari geta skilaboð ekki orðið!
Ég vissi að mörgum misbýður allar þessar áfengisauglýsingar. Ég vissi hins vegar ekki hve þetta neikvæða viðhorf er almennt og útbreytt. Þess vegna óraði mig ekki fyrir því hvílíka gríðarlega og snögga dreifingu auglýsingin hér að neðan fékk.
Ég sendi hana frá mér kl 14:01 í gær þann 11. febrúar. Á þessum rúma sólarhring sem liðin er þá hafa þúsundir ef ekki tugþúsundir íslendinga tjáð hug sinn og afstöðu til áfengisauglýsinga með því einu að senda auglýsinguna áfram til vina sinna. Afstaða þjóðarinnar liggur algerlega ljós fyrir - fólk vill ekki þessar auglýsingar.

Mýtan um að einungis sænsk menntaðir vandamálafræðingar og örfáir sérvitringar væru á móti þessum áfengisauglýsingum er sem sagt gjör fallinn -
Þeir einu sem fylgjandi eru áfengisauglýsingum eru greinlega aðeins örfáir áfengisframleiðendur / innflytjendur sem og hagsmunasamtök þeirra. Aðilar sem í krafti gríðarlegs fjármagns auglýsa í miklu trássi við skoðanir megin þorra almennings.

Börn, unglingar, velferð þeirra, frelsi til að vera laus við það áreyti sem áfengisauglýsingar eru, eru hin skýru skilaboð þess mikla fjölda fólks er sendi skilaboðin áfram í dag. Þau skilaboð ber að virða.

Sýnum hug okkar í verki

Sýnum hug okkar í verki
Sendið myndina áfram til vina með því að fara yfir myndina með örina og smella músinni á rafpóstsendingu.

Fundur í Víðistaðaskóla & Jazzmessa

Fundur í Víðstaðaskóla
Hélt fund í Víðistaðaskóla með STH félögum. Fórum í gegnum helstu mál og það sem er á döfinni. Fín mæting og góðar umræður. Fleiri fundir af þessu tagi á dagskránni næstu vikur. Þeir vinnustaðir sem óska eftir fund geta haft samband við skrifstofu sími 555 36 36

Brá mér í messu í gær;
Jazzmessu, en verð að viðurkenna að ekki var það nú blessað guðsorðið eitt og sér sem dró mig þangað, enda telst ég vart kirkjurækinn maður. Ágætur kunningi minn Ómar Guðjónsson gítarleikari og bróðir hans Óskar saxafónleikari ásamt píanista einum, léku afburðar fínan jazz í Víðistaðakirkjunni. Frábær flutningur og ekki spillir fyrir að "sándið" í kirkjunni er mjög gott. Hitt er svo auðvitað ekki verra að hlusta á hinn ágæta boðskap kirkjunnar. Hefði kannski verði viðeigandi að hafa vini mína í Mínus með mér , er viss um að drengirnir hefðu bara haft gott af því í öllu tilliti.

Mér finnast áfengisauglýsingar

Mér finnast áfengisauglýsingar
sem dynja kerfisbundið á börnum og unglingum ekki vera spurning um tjáningarfrelsi. Þetta eru þrælskipulagðar söluherferðir sem kosta stórfé og miða að því einu að auka sölu vöru sem ekki er ætluð ungu fólki?
Þessi fyrirtæki eru því í raun boðflennur í líf barna og unglinga. Þessi fyrirtæki hika ekki við að búa til lífsstíl og gjörauglýsa hann eins og hann sé viðtekin. Íslendingar eru ekki rallhálfir af bjórdrykkju fyrir framan fótboltasjónvarpið á laugardögum - það er auglýst óskhyggja áfengisframleiðenda og það er þeirra leið til þess að móta lífstíl óharðnaðra unglinga. Tjáningarfrelsinu fylgir ábyrgð - áfengisauglýsingar lúta ekki þeirri ábyrgð nema síður sé.

Ef ég ætti 500 milljónir
og mér væri í nöp við t.d. útlendinga og ég myndi kjósa að eyða öllum þessum peningum í auglýsingar og úthúða öllu þessu ágæta fólki, væri ég þá að gera það í nafni tjáningarfrelsis.
Ég er hræddur um að svo yrði ekki raunin, ég væri auðvitað kallaður rasisti og það með réttu. Ég legði fólk í einelti í krafti fjármagns og þetta fjallaði á engan hátt um tjáningarfrelsi.

Ef maður segir frelsi
þá verður maður líka að segja ábyrgð. Ef maður lifir í samfélagi þá verður maður að taka tillit til ýmissa annarra hagsmuna en sinna ýtrustu. Frelsi barna og unglinga til þess að vera laus við þessa samfélagslegu boðflennu, áfengisauglýsingar, er mun mikilvægara í mínum huga heldur en frelsi til þess að brjóta lög og freista þess að ota áfengi að börnum og unglingum. Hvar liggja hin siðferðilegu mörk - eða eru þau yfirleitt til staðar hvað varðar áfengisauglýsingar???

Dagskinnan 1. árs

Dagskinnan 1. árs
Málgagnið 1. árs í dag 31/1 2004. Byrjaði sem verkefni í kúrsinum Nám og kennsla a Netinu í framhaldsdeild KHÍ þar sem dr. Salvör Gissurardóttir opnað sýn mína inn í þessa skemmtilegu veröld - Netheima. Verð henni ávallt þakklátur fyrir þessi kynni. Umferð um vefinn ávallt verið góð og komið mér á óvart og því vaknaði sú hugmynd hvort ekki væri rétt að breyta vefnum í dagskinnu formanns Starfsmannafélags Hafnarfjarðar.
Dagskinna formanns varð því raunin og hugmyndin sú að hafa möguleika á því að vera ögn persónulegri í skrifum en maður getur verið á formlegri heimsíðu stéttarfélags. Hugmyndin virkar, aðsókn er með ágætum fólk sendir mér tölvuskeyti með öllum hugsanlegum og óhugsanlegum viðbrögð við skrifum á síðunni - sérstaklega hvað varðar kjaramálin. Hef hins vegar farið víða í umfjöllun um landsins gagn og nauðsynjar og mun gera áfram . En sem sagt í stuttu máli 2.797 línur , 25,117 orð og 126.113 stafir og 7.355 gestir þegar að þetta er skrifað.

Hvað á að gera við síbrotamenn með einlægan brotavilja ?

Hvað á að gera við síbrotamenn með einlægan brotavilja ?
Langar að velta upp einni hlið umræðunnar um áfengisauglýsingar af gefnu tilefni þar sem að akkurat þessa dagana birtast kolólöglegar og grímulausar áfengisauglýsingar í Fréttablaðinu, m.a. 28,29 & 30 janúar

Einlægur brotavilji í verki og á þá ekki að taka á því í samræmi við það? Þjást lögregluyfirvöld af einhverri verkfælni?
Ef fyrirtæki eins og þessi sýna í verki einlæga síbrotahegðun má þá ekki einnig gera ráð fyrir að öll menning fyrirtækisins sé sama marki brennd?

Og eru menn þá nokkuð hissa að fólk sniðgangi fyrirtæki sem ganga fram með þessum hætti. Vill einhver eiga samskipti við síbrotamenn? Ekki ég, og því hvet ég auðvitað alla til að sýna hug sinn i verki.

Ágæti Ríkislögreglustjóri og aðrir viðtakendur

"Ágæti Ríkislögreglustjóri og aðrir viðtakendur
Bendi Ríkislögreglustjóraembættinu á heilsíðuauglýsingu á blaðsíðu 3 í Fréttablaðinu miðvikudaginn 28 janúar. Auglýsingin er án nokkurs vafa gróft brot á lögum um bann við áfengisauglýsingum. Af því tilefni óskar undirritaður eftir því að embættið taki málið til formlegrar rannsóknar og meðferðar.

Áfengisframleiðendur ganga sífellt lengra í ólöglegum auglýsingum. Samkvæmt íslenskum lögum eiga börn og unglingar rétt á því að vera lausir við áreiti af þessu tagi. Sá réttur er algerlega virtur að vettugi og áfengisframleiðendur fara sínu fram , að virðist átölulaust af hálfu hins opinbera. Ég skora því á þar til bær yfirvöld að taka höndum saman og koma málum í það horf sem hagsmunir barna og unglinga eiga skilið.

Virðingarfyllst,
Árni Guðmundsson
Æskulýðs- og tómstundafulltrúi í Hafnarfirði"

Skrifaði sem sagt bréf til Ríkislögreglustjóra í dag og vona að menn fara nú að taka á þessum "einlæga brotvilja" áfengisframleiðenda.

Áfengisauglýsingar - boðflenna í tilveru barna og unglinga.

Áfengisauglýsingar - boðflenna í tilveru barna og unglinga.
"Ef maður segir frelsi þá verður maður líka að segja ábyrgð. Ef maður lifir í samfélagi þá verður maður að taka tillit til ýmissa annarra hagsmuna en sinna ýtrustu.

Frelsi barna og unglinga til þess að vera laus við þessa samfélagslegu boðflennu, áfengisauglýsingar, er mun mikilvægara í mínum huga heldur en frelsi til þess að brjóta lög og freista þess að ota áfengi að börnum og unglingum.

Hvar liggja hin siðferðilegu mörk - eða eru þau yfirleitt til staðar hvað varðar áfengisauglýsingar???"