Sniðgöngum auglýstar áfengistegundir

Sniðgöngum auglýstar áfengistegundir
Er óvænt lentur í ritdeilum á hinum ágæta vef www.skodun.is. Tilefnið áfengisauglýsingar, en sem kunnugt er þá eru lög um bann við þeim þverbrotnar og það sem verra er að hið opinbera virðist láta það algerlega óáreytt?

Veit það í gegnum starf mitt sem æskulýðsfulltrúi að mörgum forráðamönnum blöskrar hve langt menn ganga í brotunum og undrast auðvitað hvers vega ekkert sé gert til þess að spornar við þeim.

Eru viðskiptahagsmunir mikilvægari en velferð barna og unglinga? Um þetta deila menn, frjálshyggjan er ekki í vandkvæðum með valið - auðvitað viðskiptahagsmunir - Gef ekki mikið fyrir slíka lífsýn og velti fyrir hugtökum eins og "samábyrgð" og hvort"samfélagið" eigi að vera hrúga af einstaklingum sem ekkert varðar um annað en eigin nafla?

Til hamingju Hafnarfjarðarbær
Mál Mörtu Bergmann fv félagsmálastjóra. Þyrnum stráð sex ára þrautargöngu loksins lokið. Til hamingju með það en best hefði auðvitað verið að niðurstaða bæjarráðs hefði verið samhljóða niðurstaða allra bæjarráðsmanna. Því verður vart trúað, í ljósi forsögu þessa máls, að einhverjir bæjarfulltrúar hefðu viljað láta dæma Hafnarfjarðarbæ til greiðslu skaðabóta vegna kol ólöglegrar uppsagnar ?

Sjá úr fundargerð bæjarráðs:
"13. Starfslokasamningur Mál nr. BR040036
Lögð fram tillaga að sátt í tilefni af starfslokum fyrrverandi félagsmálastjóra.
Tillagan var samþykkt með 3 atkvæðum. Bæjarráðsmenn Sjálfstæðisflokksins sátu hjá.
Bæjarráðsmenn Samfylkingarinnar óska bókað: "Lögmenn á vegum bæjarins telja að það sé skynsamlegt og rökrétt að ná sátt í málinu vegna starfsloka fyrrv. félagsmálastjóra frekar en að málið fái lyktir í dómskerfinu." "

Stjórnarfundur í dag

Stjórnarfundur í dag
og margt á dagskrá sem endranær. Rætt var um komandi samninga og á hvern veg best er að standa að þeim. Ljóst er að það stefnir í víðtækt samstarf bæjarstarfsmannafélaga og sennilegt að í Samfloti með okkur verði öll félög frá Húsvík og upp í Borgarnes. Norðurlandi vestra án Ólafsfjarðar, Vestfirðir og Vesturland mynda Kjarna félagið.

Ef þetta verður að veruleika þá standa 4.000 manns á bak við þetta starfstarf sem er öllu fleiri en mynduðu gamla Samflotið.

Þungt í ASÍ
Hljóðið í ASÍ fólki er þungt um þessar mundir og einhverjir sem ræða um verkföll þar á bæ þ.e.a.s ef ekki fari einhver hreyfing að komast á mál.

Hefðbundin grátur vinnuveitenda bætir ekki úr skák og "nýjar fréttir" úr þeim ranni um óvenju hátt launahlutfall hér landi er einungis til þess falinn að auka hörkuna.
Bullandi gróði fyrirtækja í landinu blasir hvarvetna við og það er akkurat í góðæri sem þessum sem ráðrúm til verulegra kaupmáttaraukningar er fyrir hendi.

Nýr sumarbústaður.
Jafnframt hefur verið ákveðið að festa kaup á nýjum sumarbústað í nágrenni við Stykkishólm. Með okkur í samstarfi um þessi mál er SfK (Starfsmannfélag Kópavogs) og félagið í Garðabæ.

Hér er um afar vandaða og glæsilega bústaði að ræða sem staðsettir eru á sjávarlóðum við vík skammt frá bænum. Bústaðir þessir eru búnir öllum helstu þægindum eins og heitum pottum.

Okkar helstu spésilistar í byggingartæknifræðum Svanlaugur og Kristján á Umhverfis og tæknisviði búnir að fara yfir lýsingar og fleira og koma með góðar ábendingar um það sem betur má fara varðandi smíðina ,efni og. fl. Sannkallaðir Haukar í horni. Breiðafjarðareyjar og Nesið því nýr vettvangur sumarleyfa fyrir STH félaga á sumri komanda.

L. Norðfjörð

L. Norðfjörð
góðkunningi minn og skáld sendi mér frumsamið ljóð sem mér er bæði ljúft og skylt að birta:

Hver á sér smartara föðurland

Hver á sér smartara föðurland
Með fjöll og dal og svartan sand
með suðurljósa bjarmaband
og björk og lind í brekku?
Með friðsæl híbýli, ljós og kvæði
svo langt frá heimsins vígaslóð
varðveiti, drottinn, okkar dýru grund
er duna jarðarstríð

L. Norðfjörð 2004

Hagsmunagæsla per excellence

Annan mann
kannast ég við sem stóð í hagsmunagæslu fyrir sjávarútveginn árum saman . Gerði það með eindæmum vel. Svo vel að blessaður fiskurinn í kringum landið og jafnvel víðar átti sér ekki undankomu auðið, einstefna í veiðafæri vina hans hinn blákaldi veruleiki hins íslenska fiskistofns.

Taktíkin var einföld , því að í hvert skipti sem blessuð stjórnamálmönnunum datt í huga að smábátasjómenn og jafnvel hinar dreifðu byggðir landsins ættu að fá nokkra fiska í sinn hlut, svona rétt til þess að menn gætu gert sér eitthvað til dundurs í fásinninu, þá birtist hann í öllum hugsanlegu og óhugsanlegum fjölmiðlum og vann málið á tárakirtlunum einum saman.

Lá á stundum við að tárabunan stæði beint út í loftið, úr báðum augunum samtímis, um leið og hagsmunagæsluaðilinn tilkynnti að landið leggist í auðn ef sægreifarnir misstu 1-2 þorska til alþýðunnar, sem auk þess kynni ekkert með auðlindina að fara.
Táraflóðið ómælt í áranna rás og í raun aðdáunarvert hve vel tárakirtlarnir hafa staðist hið mikla og sífellda álag.

Mitt ráð til hagmunagæslumanna, í ljósi síðasta pistils um krankleika í hálsi, er því það að ef hin táknræna "nei" hreyfigeta er í lamasessi - nýtið þá tárakirtlana í staðin, þeir eru nokkuð vannýtt auðlind í baráttunni gegn betri launum almennings.
"Ef láglaunafólkið fær meira kaup þá fer allt í.... vitleysu ...verðbólgu ... ekkasog , ekkasog .... gengisfelling .... meiri tár ..... ekkasog ....o.sv.fr" Sem sagt endurtekið í sífellu sömu rulluna og eftir þörfum hverju sinni.

Það mun því væntanlega í fyllingu tímans fara fyrir öllum peningunum í landinu eins og fyrir fiskunum , allir aurarnir rata í örfáa vasa og þar sem allir hinir peningarnir eru þegar niður komnir - Og þá er auðvitað tilganginum náð - ekki satt ?

Krónísku nei-inn

Heyrði sögu af manni einum í innsta hring hjá vinnuveitendasamtökum hins opinbera er kenndi sér krankleika í hálsi, sel hana ekki dýrari en ég keypti hana og nefni engin nöfn og læt þess ekki getið að hún geti átt við um Hafnfirðing einn ágætan.

Sagan er sú að þar sem að viðkomandi hafi árum og jafnvel áratugum saman mælt mót hinum eðlilegu og hógværu óskum launþega þá séu hálsliðir allir er mynda hina táknrænu hreyfingu "Nei" gjöreyddir orðnir. Viðkomandi búin að vinda höfðinu af miklu óhófi til beggja hliða með skelfilegum afleiðingum bæði fyrir launþega sem og eigin heilsu.

Hitt, sem er ekki betra, er að viðkomandi er orðinn með öllu óhæfur til þess að kinka kolli til samþykkis í þeim göfuga tilgangi að gefa táknbundið "já svar" og í þau fáu skipti sem það gerist þá kveða við brestir miklir samfara miklum sársauka. Allt fast og hreyfigeta þessara vannýttu liðamóta verulega takmörkuð orðin, jafnvel samgróin að hluta til og allt vegna langvarandi iðjuleysis.

Því er spurt: Er láglaunastefna sjúkdómur í stoðkerfi eða leiðir hún bara til þess hjá einstaka mönnum?

Vonandi tekst þó hæfustu sjúkraþjálfurum þessa lands að kippa þessu í liðinn - sérstaklega hvað "ja´-inn" varðar. Verkefnið sennilega afar erfitt - þó ekki óleysanlegt - og vonandi lokið fyrir næstu kjarasamninga.

Dagskinnan

Dagskinnan
Hlutverkið er einfalt, að segja hlutina hverju sinni eins og þeir blasa við undirrituðum og út frá þeim hagsmunum er við í verkalýðshreyfingunni stöndum vörð um. Vera trúr sannfæringu sinni og benda á það sem betur má fara. Augljóslega margt í þeim efnum eins og fram kemur í pistlum á dagskinnunni.

Sem betur fer er einnig margt sem endar vel ( svo ég hughreysti lesanda einn sem finnst Dagskinnan nokkuð óvilhöll vinnuveitendum og tóninn fullhvass á stundum ?)

Minnist í þeim efnum nokkurra verulega erfiðra úrlausnarefna er tengdust áföllum eða veikindum félagsmanna þar sem að bæjaryfirvöld stóðu sig með mikilli prýði og hafa oft teygt sig langt út fyrir þær skyldur sem þau hafa í slíkum málum. Mannlegt kerfi, á stundum, þrátt fyrir allt og ekkert nema gott eitt um það að segja og mér bæði ljúft og skylt að koma því á framfæri.

Af jakkafata-krimmum og öðrum krimmum

Af jakkafata-krimmum og öðrum krimmum
Rak í rogastans er ég heyrði fréttir um að upp úr "samningaviðræðum" olíufélaganna og Samkeppnisstofnunar hefði slitnað þar sem menn næðu ekki "samkomulagi" um sektir? Eins og það væri eitthvað til að díla um?

Sögu heyrði ég af ógæfumanni einum uppi í Borgarnesi sem hafði verið ölvaður um nokkra hríð, gerst svangur og stolið kjötlæri í kaupfélaginu. Hef ekki heyrt annað en að hann hafi verið færður í böndum í steininn í stað þess að efna tafarlaust til fundar við lögguna, ganga síðan af velli þungur á brún, tönglast á því að hann og löggan hefðu ekki náð samkomulagi um sektir í málinu.

Það eitthvað sem er ekki að gera sig - eiga fyllbyttur sem stela að vera í jakkafötum? Eða er bara verið að gera grín að almenningi?

Boðflennu hent út

Boðflennu hent út.
Nú á dagskinnan að vera orðin söm eftir leiðindasamskipti við hið óvandaða vefkompaní nepstern.com sem sýnir viðskptasiðferði sitt í verki með því að planta auglýsingaforit um eigið ágæti, tekur vefslóðir fólks traustataki og freistar þess að gera sig að upphafssíðu hjá vammlausu fólki um víða veröld. Viðskiptasiðferði mörgum stigum fyrir neðan farandsölumenn sem stinga fæti inn fyrir dyrnar þegar á að loka á þá.

Aðlögunarsamning við Heilsugæsluna á Sólvangi
var lokið skömmu fyrir jól. Samningurinn gildir fyrir félagsmenn STH og SFR. Samningurinn er á svipuðum nótum og samningur SFR og Reykjavíkurborgar vegna heilsugæslunnar.
Sá sem þetta ritar hvetur félagsmenn sérstaklega til þess að nýta sér kafla um endurmenntunarmál enda liggur nokkur launaleg umbun í því samkomulagi.
Þátttaka í námskeiðum er ekki bara góð fyrir einstaklinga og stofnanir, hún er einnig ágæt fyrir budduna og því óráðlegt að láta slíka mögleika ónýtta. Ef menn nýta alla möguleika námskeiða þá getur hækkun numið allt að 12- 15 þús á mánuði þ.e. mun á þeim sem engin námskeið hefur tekið og þess sem hefur tekið allt sem hægt er. 144.000 - 190.000 krónur á ári er ekki lítið og hver hefur efni á að hafna slíku? Frumkvæðið liggur hjá ykkur í þessum efnum ágætu félagsmenn.

Kraftaverk

Kraftaverk
Nýja árið 2004 heilsar með kraftaverkum. Varð vitni að tveimur slíkum í dag. Viti menn tveir ungir menn, sennilega að eigin mati fatlaðir, gengu eins og ekkert væri. Lögðu bílunum sínum í sitt hvort bílastæðið merkt fötluðum við inngang Samkaupa og gengu algerlega óstuddir inn í verslunina. Kraftaverk nema ef vera skyldi að fötlunin sé á hinu andlega sviði? Eða drengirnir bara einfaldlega illa upp aldir og tillitslausir - ætli séu verkir með þessu? Alltaf leiðinlegt að sjá Super egóista að störfum eins í þessu tilfelli. Er þetta ekki sama liðið og kann ekki á raðir?

Anno horrabillis?

Anno horrabillis ?
Nei en annasamt engu að síður. Skipulagsbreytingar reyndu á og vissulega margt í því ferli sem mun betur hefði mátt fara. Það sem hins vegar veldur undirrituðum nokkrum áhyggjum eru hin miklu, tíðu og kostnaðarsömu samskipti við lögfræðinga varðandi úrlausnir ágreiningsefna milli félagsins og bæjaryfirvalda.

Mál fyrrverandi félagsmálastjóra er búið að velkjast í kerfinu árum saman, ágreiningur um fæðingarorlofsgreiðslur er komið inn í dómskerfið, fyrirspurnum varðandi lífeyrismál og uppgjör réttinda við starfslok ekki svarað, svo dæmi séu nefnd. Allt eru þetta mál sem kosta mikla fjármuni og í raun umhugsunarefni hvers vegna þarf að fara með þessi mál svona langt.

Fyrir það fyrsta þá eru mál af þessu tagi dýr og í öðru lagi afar sérstætt ef bæjarfélag streitist á móti og sýnir mikla óbilgirni í málum sem fyrirfram verður að telja gjörtöpuð. Dæmi um slíkt er hinn afar skýri Hæstaréttardómur um á hvern veg fara á með greiðslur í fæðingarorlofi. Skilaboðin úr því máli eru óþægileg fyrir félagið. Til dæmis einfaldlega sú áleitna spurning ef félagið hefði setið með hendur í skauti, hefðu þá réttindi viðkomandi verið fótum troðin og er það þá stefna bæjarins að standa að slíku. Er það stefna bæjarins að greiða ekki fyrr en öll sund eru lokuð og þegar að búið er að eyða ómældu fé í lögfræðikostnað? Er ekki illa farið með takmarkað fé bæjarsjóðs og ekki síst, eru skilaboðin sem í þessu brölti felast samboðin virðulegu sveitarfélagi eins og Hafnarfjarðarbæ?

Launastefna
Hver er hin raunverulega launastefna bæjarins? Er hún að vísa öllu til launanefndar sveitarfélaga (LN). Væri ekki nær fyrir Hafnarfjarðarbæ að líta til bæjarfélaga eins og Reykjanesbæjar og Garðabæjar sem láta hina grjóthörðu láglaunastefnu LN sem vind um eyru þjóta og greiða sínu fólki að öllu jöfnu hærri laun en hin afar umdeilanlega stefna LN gerir ráð fyrir.
Væri það ekki nær heldur en að leggja sig í líma við og eyða ómældri orku í það að halda öllum launum í neðstu viðmiðum með tilheyrandi óánægju starfsmanna. Það er hægt að vinna þetta mun léttara eins og dæmin sanna.

Mín skoðun er einfaldlega sú að Hafnarfjarðarbær á að brjóta sig undan ofurvaldi LN og hreinlega hætta þátttöku í þessu bandalagi lægstu viðmiða. Ég tel reyndar lögfræðilegan vafa á því að bæjarstjórnir geti afsalað sér ákvörðunarrétti af þessu tagi til þriðja og óskylds aðila. Gæti Hafarfjarðabær með sama hætti afsalað forræði í skipulagsmálum?? Augljóslega ekki.. Mitt ráð er því - Út úr LN og því fyrr því betra. Vera bæjarins í LN og með forystuhlutverki þar á bæ, gerir það að verkum að Hafnfirsk launapólitík verður eins og skapalón fyrir grjótharða láglaunastefnu LN. Klókt ? - varla, og sennilega mjög óhollt pólitískt.

Rússneskt viðskiptasiðferði
Andsk... eru menn í vafasömum erindum í efnahagslífinu. Að formaður í Efnahags og viðskiptanefnd Alþingis, Pétur Blöndal sé aðalforsprakkinn í yfirtöku á Sparisjóði Reykjavíkur er ekki bara óviðeigandi heldur einnig algerlega siðlaust. "Rússneskt viðskiptasiðferði" að verða hin almenna regla hér á landi ?

Gleðilegt ár með þökkum fyrir samskiptin á árinu sem nú er að líða og með bestu óskum um far- hagsæld á nýju ári

Gleðileg jól
Alvöru skata á Hansen í hádeginu , fanta sterk og fínt fyrir bragðlaukanna í aðdraganda hátíðarhaldanna. Óska lesendum öllum gleðilegra jóla

Leiðindar Matador

Leiðindar Matador
er þetta íslenska efnahagslíf orðið. Bankarnir nánast komnir á tvær klíkur og öll mestu verðmæti leiksins komnar á fárra hendur. Taparar sem fyrr íslensk alþýða. Veit ekki hvert stefnir og hve mikið meira er hægt að kreista út úr spilinu áður en illa fer.

Frelsi hverra - veit það ekki - alla vega ekki launafólks sem hefur þvert á móti fjármagnað ný frjálshyggjuna ótæpilega í formi okurvaxta, þjónustugjalda, ofurverðlags, verðsamráðs og einokunar af margvíslegu tagi, svo ekki sé minnst á þær eigur samfélagsins sem nánast hafa verið gefnar burt í nafni einkavæðingar.

Ábyrgðarlaust drasl

Ábyrgðarlaust drasl
Fjárfesti í bleksprautuprentara hjá BT í byrjun desember á síðasta ári (2002). Taldi mig gera góð kaupi,12.000 kall og tveggja ára ábyrgð. Rétt fyrir ársafmæli prentarans kveða við mikil óhljóð í honum þar sem ég er að prenta og ljóst að ekki er allt með felldu.

Fer með ábyrgðaskírteinið í annarri hendinni og prentarann í hinni á BT "verkstæðið" og segi farir mínar ekki sléttar, en viti menn tjónið ekki bætt þar sem það var ekki talið galli! Drasl segi ég á móti og held því fram að prentari sem ekki þolir tæplega ársnotkun sé auðvitað meingallaður. Það er ekki mat BT en mín niðurstaða þessi: Dýrt drasl sem ekkert endist og léleg þjónusta.

Starfskjaranefnd fundaði í dag

Starfskjaranefnd fundaði í dag
og að vanda mörg mál á dagskrá. m.a. eftirlaunamál , óskir um endurmat á störfum , lífeyrismál, mat á iðnréttindum, umræður um starfsmat, vinnufyrirkomulag og launagreiðslur, breytt störf vegna stjórnsýslubreytinga m.m.

Stjórn skiptir með sér verkum
Á aðalfundi STH er kosinn formaður hverju sinni en öðrum verkum skiptir stjórn með sér og verkefni fyrsta stjórnafundar nýrrar stjórnar fólst m.a. í því. Sigríður Bjarnadóttir var kjörinn varaformaður, Haraldur Eggertsson gjaldkeri, Hallgrímur Kúld ritari og Geirlaug Guðmundsdóttir meðstjórnandi. Jafnframt var ákveðið að varamenn kæmu meira inn á fundi en verið hefur.

Bæjarstarfsmenn gera sér glaðan dag
Blessuð jólaglöggin eru í hámarki þessa daganna bæjarstarfsmenn á Strandgötu áttu góða kvöldstund saman á föstudag og starfsfólk skólanna hefur verið að hittast undir svipuðum formerkjum undanfarið. Fór að velta því fyrir mér hve andsk.... mikið er til að skemmtilegu fólki meðal bæjarstarfsmanna. Hinn hefðbundni ( en afar mikilvægi ) launablús víkur um stund. Dagsins amstur lagt til hliðar og fólk skemmtir sér nokkuð ærlega.

S.l. ár skrifaði sá sem þetta ritar grein á heimasíðu STH undir heitinu Húsbændur og hjú. Greinin vakti afar sterk viðbrögð má segja að höfundur hafi aldrei fengið jafn mikið hrós og jafn miklar skammir fyrir einn pistil ( Og kallar maður ekki allt ömmu sína í þeim efnum.) Greinin fjallaði um einhverskonar stéttarskiptingu varðandi framkvæmd á jólahlaðborði í ónefndri stofnun hér í bæ.

Hafnfirskir bæjarstarfsmenn eru bæði fáir og illa launaðir en eru jafnframt afar dugmiklir ef marka má statiskik Verslunarráðsins sem hér var gerð skil um daginn. Það er því afar mikilvægt að bæjarstjórnir á hverju tíma sýni hug sinn verki til starfsfólks. Að bjóða starfsmönnum sínum til málsverðar 2 -3 á ári er ein leið til þess, önnur afar góð væri að borga hærri laun og sú þriðja að fara ekki út í einhverskonar skipulagsævintýri og stjórnsýslubreytingar nema að afar vel athuguð máli og í fullu samráð við þá sem það snertir.

En sem sagt gott framtak varðað þeim vegvísi að starfmenn óháð starfi , menntun, kynferði ,þjóðerni , háralit og öllu því sem kann að draga fólk í dilka nú til dags, er látið lönd og leið og markmiðið það eitt að eiga góða kvöldstund saman. Fannst það hafa tekist og vona að svo hafi verið almennt á starfsstöðum bæjarins fyrir þessi jól.

Leggja 400.000 kallinn snarlega inn aftu

Leggja 400.000 kallinn snarlega inn aftur
hjá Kaupþingi er mín ráðlegging til forsætisráðherra. Hann er algerlega einn af genginu og á auðvitað að hafa peningana sína á vísum stað eins og hitt sjálftökuliðið. Það er auðvitað með eindæmum að ríkistjórn sem lagst hefur í kerfisbundin slagsmál við sárafátæka öryrkja, ríkistjórn sem státar af láglaunapólitík sem á sé vart hliðstæðu þó svo að víða væri leitað, skuli gera sérlega veglegan starfslokasamning við forsætisráðherra og fjármagna ýmsar pólitískar hrókeringar í leiðinni.

Undir 100 þús
Á sama tíma og þessi sjálftökubísness á sér stað í þinginu þá eru félagar okkar í ASÍ að hefja kjarasamningaviðræður. Í þeirra röðum er fólk sem hefur vel innan við 100 þús laun á mánuði. Samningaviðræðum við þessar aðstæður er að sjálfsögðu sjálfhætt og öllum kröfugerðum pakkað niður enda úr öllum takti við fyrirliggjandi frumvarp. Kjarasamningar eru því í uppnámi og vandséð á hvernig stöðugleika verður viðhaldið þegar að s.k. landsfeður ganga fram með slíku fordæmi sem höfum orðið vitni af.

Reykingar i sprengjugeymslu!
Sá sem þetta ritar er ekki í nokkrum vafa að þessi gjörð þingsins var svipaðs eðlis og þess sem kveikir sér í sígarettu í sprengigeymslu. Menn ná nokkrum smókum en síðan fer allt í háaloft. Almenningi er misboðið í hverju málinu á fætur öðru undanfarið og ástandið í íslensku þjóðfélagi er eldfimt og lítið má út af bera svo ekki fari allt í bál og brand.

Bara tveir möguleikar
Það er því bara tvennt í stöðunni og það er að landsfeður gangi fram fyrir skjöldu með góðu fordæmi og taki af einhverju viti á þeim brýnu málum er varða hag almennings í þessu landi.
Ef ekki þá er hinn flöturinn sá að staðan splundrast og það litla sem eftir er að þjóðarsáttinni verður lagt til hliðar og að vinnandi fólk í þessu landi takist á við þau öfl í þjóðfélaginu sem hafa sópað til sín auðæfum langt umfram það sem þeim ber. Kostir verkalýðshreyfingarinnar engir aðrir en átök, ekki af vilja heldur hreinni nauðsyn.

Fanny og Alexander

Fanny og Alexander
Þessi stórmynd Bergmanns var sýnd í Bæjarbíói í gærkvöldi. Tær snilld og Kvikmyndasafninu enn og aftur þakkað frábært starf í vetur. Er búin að sjá hvert meistaraverkið af öðru.

Kærkomin hvílt frá þessum amerísku slagsmála- og ofbeldismyndum sem eru helst til fyrirséðar hvað varðar söguþráð og annað. Það er auk þess borðliggjandi að til þessa að ná sem mestum aurum í kassann þá má aðalsöguhetjan ekki verða fyrir teljandi hnjaski og hvað þá hverfa yfir móðuna miklu því þá er ekki hægt að gera "Lemjandann 2 ,3,4, og jafnvel 5"

Óðurinn til hins tilgangslausa ofbeldis í hávegum hafður eins og það sé akkurat það sem ungviðið hafi mest þörf fyrir á hinum síðustu og verstu...

...og þá eru það lífeyrismálin

...og þá eru það lífeyrismálin
hjá Rafveitunni sálugu , fundur á Sólvangi um vinnustaðasamninga, starfslok á þjónustuborði, mál fyrrverandi félagsmálstjóra, lífeyrisgreiðslur til tveggja fyrrverandi starfsmanna, samtöl við ýmsa starfsmenn varðandi skipulagsbreytingar, væntanlegur stjórnarfundur með nýkjörinni stjórn, fundur á heilsugæslu, umræður um vaktafyrirkomulag, starfskjarnefndarfundur, símtöl vegna starfsmats, fundur um framhald dómsmáls STH vegna vangoldinna fæðingarorlofslauna til nokkurra STH félaga, samtöl við skrifstofu BSRB varðandi túlkun kjarasamnings, öryggisreglur skólaliða, fundur með tilteknum starfshóp, samtal við lögfræðing félagsins og ýmislegt fleira eru dæmi um það sem drífur á daga formanns.

Sýnlegt almennum félagsmönnum? Veit það ekki, kannski svipað eins og að vera sjónvarpsfréttamaður - mikil vinna á óhefðbundnum tímum og ekki allt unnið fyrir framan skjáinn og ekki síst oft vanþakklátt starf í meira lagi.

Vinnustaðafundir

Vinnustaðafundir
Í janúar mun stjórn STH standa fyrir vinnustaðafundum. Þeir vinnustaðir sem óska eftir slíku eru beðnir að hafa sambandi við skrifstofu STH varðandi nánari framkvæmd. Síminn er 555 36 36 og rafpóstur sthafn@simnet.is