Ágæti þingmaður

Ágæti þingmaður

Foreldrasamtök gegn áfengisauglýsingum fagna frumvarpi Ögmundar Jónassonar og Þuríðar Backman um breytingar á 20. grein áfengislaga. Sjá nánar hér http://www.althingi.is/altext/138/s/0339.html . Þó svo að núverandi lög séu skýr og ekki síst hinn siðferðilegi boðskapur þeirra þá hefur ákæruvaldið og dómskerfið ekki tekið á þessum málum sem skyldi og það þrátt fyrir að kærur og ábendingar vegna ólöglegra áfengisauglýsinga nemi hundruðum. Dómar eru fjölmargir, dæmi um nokkra þeirra má sjá á heimasíðu Foreldrasamtaka gegn áfengisauglýsingum www.foreldrasamtok.is En betur má ef duga skal og í þeim efnum styrkir frumvarp Ögmundar Jónassonar og Þuríðar Backman sjálfsögð réttindi barna og unglinga til þess að vera laus við gengdarlausan áfengisáróður.

Foreldrasamtök gegn áfengisauglýsingum skora á alla alþingismenn hvar í flokki sem þeir standa til að veita þessu frumvarpi brautargengi. Velferð barna- og unglinga er brýnna verkefni en ýtrustu viðskiptahagsmunir áfengisframleiðenda. Æskan er okkar fjársjóður

Foreldrasamtök gegn áfengisauglýsingum

"Hinn rétti mælikvarði á stöðu þjóðar er hversu vel hún sinnir börnunum." (UNICEF, 2007).

Foreldrasamtök gegn áfengisauglýsingum

Heimasíða www.foreldrasamtok.is

Rafpóstur foreldrasamtok@foreldrasamtok.is

Foreldrar, forráðamenn og aðrir þeir sem bera velferð æskunnar fyrir brjósti

SNIÐGÖNGUM AUGLÝSTAR ÁFENGISTEGUNDIR

Áskorun til sveitarfélaga

Við undirrituð nemendur í grun- og framhaldsnámi og kennarar við Tómstunda- og félagsmálafræðibraut á Menntavísindasviði Háskóla Íslands skora á sveitarstjórnir að standa vörð um tómstunda og félagsstarf í sveitarfélögum á núverandi umbrota- og óvissutímum og tryggja um leið jöfn tækifæri til þátttöku í fjölbreyttu, faglegu frítíma- og tómstundastarfi. Undirrituð hafa áhyggjur af uppsögnum starfsfólks í þessum mikilvæga málaflokki víða um land. Samanber nýlega uppsögn íþrótta- og tómstundafulltrúa í Sveitarfélaginu Álftanesi.

Innlendar og erlendar rannsóknir sýna að þátttaka í skipulögðu félags- og tómstundastarfi undir handleiðslu hæfra leiðbeinenda dregur úr líkum á hvers kyns áhættuhegðun, félagslegri einangrun og skerðingu á lífsgæðum. Ávinningur af því að skerða tómstunda- og félagsstarfsemi þar sem einstaklingar eru virkir þátttakendur er því enginn. Mikill ávinningur yrði hins vegar að því að styrkja slíka starfsemi. Undirrituð benda á 24.grein Mannréttindayfirlýsingar SÞ en þar segir „Hverjum manni ber réttur til hvíldar og tómstunda“.Samkvæmt lögum um öldrunarþjónustu segir í 13.grein.

„Þjónustumiðstöðvar aldraðra sem eru starfræktar af sveitarfélögum til að tryggja eldri borgurum félagsskap, næringu, hreyfingu, tómstundaiðju, skemmtun og heilsufarslegt eftirlit. Þjónustumiðstöðvar geta starfað sjálfstætt eða í tengslum við aðra þjónustu sem aldraðir njóta“.

Einnig viljum við benda á að Ísland er aðili að Barnasáttmála SÞ. Samkvæmt 31. grein sáttmálans viðurkenna aðildarríkin rétt barns til að stunda tómstundir, leiki og skemmtanir sem hæfa aldri þess. Auk þessa skuldbinda aðildarríki sig til að virða og efla rétt barns til fullrar þátttöku til tómstundaiðju og stuðla að viðeigandi og jöfnum tækifærum. Við skulum ekki gleyma að hinn rétti mælikvarði á stöðu þjóðar er hversu vel hún sinnir börnum sínum. Mikilvægi tómstunda- og félagsstarfs verður ekki metið til fjár á tímum sem þessum og aldrei hefur verið meiri þörf fyrir faglega starfsemi á þessum vettvangi því skorum við á sveitarfélög landsins að standa vörð um þennan mikilvæga málaflokk.

F.h. nemenda og kennara á Tómstunda- og félagsmálafræðibraut MVS Háskóla Íslands,

Helga Þórunn Sigurðardóttir nemendafulltrúi - hths8@hi.is
Árni Guðmundsson námsbrautarstjóri - arni@hi.is

Af hafnfirskum bæjarstjórnarmálum - l

Einn frískasti meirihluti í Bæjarstjórn Hafnarfjarðar var meirihluti Alþýðuflokks og Alþýðubandalagsins 1986 -1990 undir forystu Guðmundar Árna Stefánssonar og Magnúsar Árnasonar. Farsælt samstarf sem leiddi til þess að kratar fengu hreinan meirihluta í kosningunum 1990. Margir túlkuð úrslitin þannig að nú væri ósk bæjarbúa sú að kratarnir færu einir með völd. Sem og varð en var misráðið því sennilega var það svo að margir bæjarbúar fyrrum fylgismenn annarra flokka studdu meirihlutann þ.m.t. sjálfstæðismenn margir hverjir sem ekki gátu hugsað sér að kjósa „kommanna“ og kusu því kratanna í staðin. Reyndin var hins vegar sú að sá ágæti drengur Magnús Árnason sem átti mjög verulegan þátt í farsæld 86-90 meirihlutans naut ekki ávaxtanna af þeirri vinnu.

Guðmundur Árni var dugmikil bæjarstjóri og afar vel virkur, ótvíræður foringi sem gerði Alþýðuflokkinn að stórveldi með opnum prófkjörum og aðkomu fjölda fólks úr grasrótinni . Guðmundur hefði hins vegar að ósekju mátt starfa lengur að bæjarmálum en í lok kjörtímabilsins 90 – 94 hvarf hann í landsmálin.

Erfið og misráðin samstarfsslit við Alþýðubandalagið 1990 höfðu mikil áhrif næstu árin og gerðu það að verkum að trúnaðarbrestur varð milli fyrrum félaga sem leiddi til þess að alskyns meirihlutar voru myndaðir með afar mismunandi árangri á tíunda áratug síðustu aldar sem endar síðan með því að Sjálfstæðismenn og Framsóknarmenn ná meirihluta.

Í flokki lítið breyttra kvenna sigraði ..

Hef aldrei skilið það hvernig hægt er að keppa í Guðsskapnaði eins og s.k. fegurðarsamkeppnir ku ganga út á að mestu leyti. Límbönd, lýta“lækningar“ og önnur trix koma einnig sterk inn og munu ef að líkum lætur gegna sífellt mikilvægari hlutverki sem fegurðaraukandi viðbætur við orginal útgáfurnar.

En þetta eitt og sér nægir ekki í nútíma fegurðarsamkeppnum. Ef marka má umræður um keppnina Ungfrú Reykjavík sem haldin var fyrir skömmu þá er orðið verulega stutt í að dömurnar sem ku koma fram í afar erótískum undirfötum smelli sér hreinlega á súluna og taki "spor". En samkvæmt Geira í Goldfinger mun vera afar algengt að háskólastúdínur iðki þessa tegund listdans til að fjármagna nám sitt.

Einhverjum finnst “ keppnin“ komin út í ógöngur. Flosi Ólafsson heitinn, sá mikli húmoristi var fyrir löngu búin að leysa svona vandamál enda langt á undan sinni samtíð. Ef forsvarsmenn fegurðarkeppna í landinu og víðar hefðu þegið hans ráð þá væri keppnin ekki orðin táknmynd klámvæðingarinnar sem „tröllríður“ samfélaginu um þessar mundir.

Flosi taldi einfaldast í þessu skyni að nýta það sem þegar var til og lagði til að gæðingamatsreglur í Handbók hestamanna yrðu nýttar við dóma á fegurðardísum og gott ef hann tíundaði ekki einnig ítarlega verklag dómara við slíkt mat. Án þess að kasta rýrð á meistara Flosa þá yfirsást honum einn mikilvægur þáttur, skiljanlega því maðurinn skrifað pistla sína á ritvél og í samfélagi sem var nýflutt út úr torfkofum, en það var líftæknin.

Ég vil því bæta örlitlu við hinn Flosiska hugmyndaheim, betrumbæta og færa til nútímans. Viðurkenni strax að ég sæki hugmyndar mínar í torfærusportið. Haganlegast og best er að skipta keppendum fegurðarsamkeppna í eftirtalda flokka: Flokkur óbreyttra kvenna , flokkur lítið breyttra kvenna og flokkur mikið breyttra kvenna. Í staðinn fyrir titilinn ljósmyndafyrirsæta keppninnar þá yrðu veit sérstök verðlaun fyrir mest/best „Fótósjoppuðu“ stúlkuna. Að öðru leyti er best styðjast við klassískar hugmyndir meistara Flosa.

Með þessu fyrirkomulagi er tryggt að okkar fegurstu meyjar séu valdar af vísindalegri nákvæmni og samkvæmt alþjóðlega viðurkenndum matskerfum sbr Handbók hestamanna. Umræða af þeim toga sem nú fer fram í bloggheimum yrði þarflaus með öllu. Ungfrú Ísland óumdeilanlega fegurst íslenskar kvenna. Málið dautt - þ.e.a.s ef maður telur það verðugt að keppa í Guðsskapnaði?

Krafturinn knýr

Þessa mynd tók ég s.l. sunnudagsmorgun í Borgarleikhúsinu.

Var viðstaddur rennsli á sýningunni Krafturinn knýr sem fjallar um hin óljósu mörk milli íþrótta og lista. Var fín sýning með mörgum ólíkum atriðum sem öll áttu það sammerkt að sýna okkur listina í íþróttum eða íþróttirnar í listunum.

Getur verið að þegar menn hætta að mæla allt og meta, hver hoppar hæðst, lengst, hraðast og með eða án ýmissa fylgihluta, þá öðlist listin fyrst líf? Veit það ekki en veit það eitt að skilin eru óljós.

Vegetarian Shoes ?

Mínir menn - ekki þeirra dagur

Er staddur í Brighton í Englandi. Notaði tækifærið til þess að kíkja á leik hjá mínum mönnum í enska boltanum Brighton and Hove Albions oftast kallaðir "Mávarnir" á máli þarlendra.

Það verður að segjast alveg eins og er að Mávarnir náðu engu flugi á móti illa spilandi liði Millwall sem þó er í efri hluta C deildarinnar. Ein varnarmistök minna manna nægðu Millwall til sigurs eitt núll. Það eru blikur á lofti hjá mínum mönnum og fallbarátta framundan - 20. sætið er ekki góður árangur og sorglegt ef feta á í slóð Crew Alexsandra liðs Guðjóns Þórðarsonar sem féll rakleiðis í það sem einu sinni var kölluð enska 4. deildin og þar ku knattspyrna rísa hve lægst og á stundum vera fremur í ætt við túnþökuristur en hina göfugu íþrótt knattspyrnu.

Kjósa strax - búið að ræða málið ?

Hafnfirskt íbúalýðræði hefur stundum verið gert að umtalsefni hér á síðunni. En það snýst aðalega um kosningar um stækkun álvers Rio Tinto. Nýjasta útspil í þeim efnum er tillaga bæjaryfirvalda um að ganga til kosninga enn og aftur með nánast engum fyrirvara eða þann 6. mars þegar að kjósa á um Icesavemálið.

Rökin núna að það sé óþarfi að "tefja málið" lengur, það sé búið að ræða þetta málefni í þaula? Það má vel vera en hitt er öllum ljóst það er einnig búið að kjósa um málið og fella fyrirliggjandi tillögu - Það lá einnig fyrir yfirlýsing frá bæjarfélaginu í kjölfar síðustu kosninga að mig minnir að ekki yrði kosið að nýju um þetta mál? og hvað þá að gera það nánast fyrirvarlaust.

Lýðræði snýst um upplýsta umræðu og verkefni samfélagsins þessi dægrin eru ærin og þó svo að Rio Tinto liggi á þá eru mög önnur mál samfélagsins brýnni næstu mánuðina. Fyrir það fyrsta þá er afar mikilvægt að Icesavemálið fái umfjöllun og að blanda inn í þá umræðu hagsmunabaráttu Rio Tinto er ekki við hæfi.

Það er ekkert í þessu Rio Tinto máli sem krefst tafalausra kosninga og ef enn og aftur á að kjósa um stækkun álversins þá eru haustið að mínu mati tilvalið - Önnur verkefni í íslensku samfélagi eru ærinn þessi misserin og mikilvægari a.m.k. fram að þeim tíma.

Ný æskulýðslög

Formaður ÆRR (Æskulýðsráð ríkisins) efndi til fundar um málefni ráðsins fyrir skömmu. Var mikið þarfaþing og ekki vanþörf að fara yfir þessi mál. Sannast sagna þá erum við íslendingar eftirbátar nágrannaþjóða okkar í þessum efnum. Ástæður þess má rekja í löngu máli en slíkt verður ekki gert á þessum vettvangi a.m.k. ekki í bili. Eitt er þó algerlega víst að við þurfum lagalega umgjörð um æskulýðsmál sem m.a. byggir á faglegum sjónarmiðum.

Einn af þeim stjórnmálamönnum sem hefur látið sig þessi mál varða er Oddný Sturludóttir sem sækist eftir 2. sæti á lista Samfylkingarinnar fyrir borgarstjórnarkosningarnar í Reykjavík. Þeir stuðningsmenn Samfylkingarinnar sem láta sig málefni æskunnar varða ættu að gefa henni gaum því þar fer ötull baráttukona. Ég átti því láni að fagna að vinna með henni ásamt öðru góðu fólki að stefnumótun á sviði æskulýðsmála en eins og þeir vita sem tilheyra þessum geira þá er löngu tímabært að koma á rammalöggjöf í þessum mikilvæga málaflokki. Tillaga um slíkt liggur fyrir og ekki síst fyrir tilstilli Oddnýjar – hvet því Samfylkingarfólk í höfuðborginni eindregið til þess að veita henni stuðning.

Sama á við um ágæta stjórnmálamenn úr öðrum flokkum. Mér dettur í hug Sóley Tómasdóttir í VG sem sækist eftir 1. sæti á lista flokksins í Reykjavík. Sóley hefur mikla reynslu í þessum geira og hugmyndir sem falla vel að velferðarmálum æskunnar. Sóley er virk í starfi Félagi fagfólks í frítímaþjónustu m.m.

Málefni æskunnar eru mikilvæg og ekki síst á tímum eins og þessum – hvet fólk, hvar í flokki sem það stendur, eindregið til þess að kjósa, í prófkjörum, fólk sem hefur þetta mikilvæga málefni í öndvegi.

Tónlistarskóli Hafnarfjarðar

Ég hef oft leitt hugann að því hversu gífurlegar "menningarveitur" tónlistaskólarnir eru. Tónlistarskólinn i Hafnarfirði er gott dæmi um slíkt. Ég hef lengi haldið því fram að það sé sterkt samhengi milli góðs gengis hafnfirskra unglingahljómsveita og góðrar starfsemin Tónlistaskólans í Hafnarfirði. Hafnfirskum hljómsveitum hefur í gegnum árin vegnað afar vel í Músíktilraunum ÍTR og ef grannt er skoðað þá hafa all flestir tónlistarmannana grunn úr tónlistarskólanum. Ágætt aðgengi að æfingaaðstöðu og góður tónlistarskóli er því formúlan.

Nám í tónlistaskóla er því ekki eins og ýmsir halda fram, leiðinlegar píanóæfingar, perlodíur og fúkur. Námið er ekki síst fyrir flesta nemendur aðgangur að áhugamáli sem endist út ævina hvort sem fólk nýtur tónlistar sem hlustendur eða iðkendur. Góðar tómstundir og eða áhugamál er spurning um lífsgæði sem ekki verða metin til fjár. Nú og svo má ekki gleyma þeim sem leggja tónlistina fyrir sig í atvinnuskyni og auðga mannlífið og menninguna með framlagi sínu.

Tónlistarskóli Hafnarfjarðar er að mínu mati afburðaskóli sem hefur á að skipa úrvals fólki. Sá sem þetta ritar hefur verið þeirra ánægju aðnjótandi á liðnum árum að sækja tónleika skólans á hinum ýmsu stigum og alltaf haft jafn gaman af hvort sem verið hafa tónleikar byrjenda eða lengra kominna. Starfsemi tónlistaskóla er alltaf mikilvæg og ekki síst á tímum eins og þeim sem við nú lifum á. Við Hafnfirðingar eru heppnir að eiga einn slíkan, sannkallaða "menningarveitu".

Færeyjar

Færeyingar eru ekki bara gott fólk því óvíða er náttúrufegurð meiri en þar. Þess mynd tók ég snemma morguns fyrir nokkrum árum í Thorshvan.

Færeyingar eru höfðingjar heim að sækja og þegar að maður hefur komið þarna einu sinni þá er eitthvað sem togar í mann að koma aftur og aftur.

Harðbýlt land lengst úti í hafi, óblíð náttúruöflin, rík menning, fegurðin og fólkið er eitthvað samspil sem gerir Færeyjar að afar áhugaverðum stað.

Hvet fólk til þess að leita ekki langt yfir skammt þegar að ferðalög eru annars vegar - Heimsókn til frænda okkar í Færeyjum er eitthvað sem engin hefur efni á að missa af.

Rio Tinto kannar hug Hafnfirðinga

Ég er í úrtakshóp Capacent Gallup (CG). Fékk nú nýverið spurningalista um Rio Tinto álverið í Hafnarfirði. Væri vart í frásögu færandi nema fyrir þær sakir að oftast hafa spurningar verið betur útfærðar hjá CG en í þessu uppleggi. Full gildishlaðnar að mínu mati og allflestar um jákvæða hluti eins "samfélagsstuðning" Rio Tinto, um forstjórann og fleira í þessum dúr. Sumar spurningarnar eru illa fram settar sbr dæmið hér að neðan. Kannski ekki að sökum að spyrja þar sem fyrirtækið er í krafti gríðarlegs auðmagns að hefja kosningarbaráttu, þá aðra á skömmum tíma um sama málefni þ.e. stækkun álvers Rio Tinto.

Hvernig svarar maður spurning eins og þessari hér að neðan á fimm þrepa kvarða frá "mjög vel" til "mjög illa"

Hversu vel eða illa telur þú að Alcan standi sig í upplýsingagjöf til almennings um starfsemi álversins í Straumsvík?

Svarið er að mínu mati þetta: Mjög vel í því að kom á framfæri einhliða og áróðurskenndum boðskap um eigið ágæti þar sem hvergi er dregið af og hvergi til sparað. Í stuttu máli, gott í miðlun einhliða áróðurs um eigið ágæti. Er það þá góð upplýsingagjöf? Nei - en það getur verið góð miðlun (þ.e.a.s. að koma á framfæri boðskap) - undarlega spurt og afar aðferðafræðilega ónákvæmt. Ótæk spurning

Rio Tinto er í kosningaham í sparifötunum - CG sem að öllu jöfnu stendur sig vel er hér í verkefni þar sem niðurstöður verða "háðar" og ónákvæmar m.a. vegna uppbyggingar spurningalistans, sem er súrt. Setningin "samkvæmt niðurstöðum Capacent Gallup þá ... " hefur ávallt haft sterka ímynd í hugum margra - sennilega er þetta ein af þeim könnunum þar sem niðurstöður verða ekki kynntar opinberlega þannig að ekki reynir CG í þessum efnum?

Af pólitískum analýsum

Veit ekki hvort þessi ágæta lausavísa Páls Ólafssonar sé nokkuð verri en aðrar pólitískar analýsur þessa daganna?

Hænurnar eru mesta mein
mitt og allra á bænum,
þó er verri Ólöf ein
áttatíu hænum.

Höfundur:

Páll Ólafsson (1827-1905)

Stutt i Heklugos

Ég held að það sé ekki langt í Heklugos sbr. myndina hér sem tekin var í gær 2. janúar frá Snjallsteinshöfða.

Ég hef tekið fjölda mynda af fjallinu í gegnum árin og minnist þess ekki að að hafa séð það svona autt að hluta til í tíð eins og núna - Það er greinilegt að snjó festir ekki í suðurhlíðum fjallsins eins og glögglega má sjá á myndinni - Held því fram að brátt hitni verulega í kolum enda fáar aðrar skýringar á snjóleysinu en undirliggjandi hiti?

Farsælt kom(m)andi ár

Óska lesendum síðunnar gleðilegra jóla og farsældar á kom(m)andi ári (eins og vinur minn einn orðaði þessa kveðju ávallt) á sennilega vel við í ár.

Ekki fyrir viðkvæma

Álver í Vatnsmýrina

Leik blak með félögum mínum í HÍ. Í þeim ágæta hópi er margt skrafað að leik loknum og mörg heimsins vandamál krufin til mergjar og jafnvel leyst ef svo ber undir. Ekkert mál er svo ómerkilegt að það verðskuldi ekki umræðu þessa ágæta hóps sem gegnir heitinu Blakmenn Björgvins.

Nú bar svo við, þar sem nokkrir Hafnfirðingar eru í þessum hóp, að málefni álversins í Straumsvík komst á dagskrá. Töldu Hafnfirðingar undarlegt í meira lagi að endalaust væri kosið um sama mál, eða átti bara að kjósa þanngað til að Rio Tinto ynni sigur í íbúakosningum? Sem leiðir hugann að þessu sem kallast íbúalýðræði sem á hafnfirska vísu gengur út á það að bláfátækir einstaklingar standa í baráttu við alþjóðlegt stórfyrirtæki sem ekki unir úrslitum kosninga. Ekki veit ég hve mörg hundruð milljónir fóru í síðustu kosningabaráttu Rio Tinto "hreyfingarinnar" eða "samtakanna". Og glansauglýsingar þar sem hin fegurstu tákn íslenskrar náttúru eru nýtt sem bakgrunnur í grímulausum áróðri Rio tinto eru þegar byrjaðar að birtast og sem fyrr verður ekki spurt um peninga þegar "kosningabaráttan" er hafin.

En svona er það nú - einhverjir telja starfsemi álvera lausn morgundagsins og því fleiri og stærri sem þau eru saman komin því betra. Í því ljósi kom fram mikilvægt innlegg eða tillaga ónefnds blakfélaga inn í alla þessa álversumræðu, tillaga sem myndi að mati einhverra efla til mikilla muna atvinnuástandið í höfuðborginni og reyndar á öllu stór-Hafnarfjarðarsvæðinu ef því er að skipta.

Sem sagt hugmyndin um að reisa 600 - 700 þúsund tonna álver í Vatnsmýrinni. Flugvöllurinn mun hvort sem er víkja fyrr eða síðar og ekki fyrirséð að verktakabransinn hafa stórfelld áformum um íbúðabyggingar á svæðinu í bráð. Þar er plássið og þar eru þessar fínu samgöngur, mætti jafnvel hugsa sér að halda einni flugbraut opinni meðfram fabrikkunum eða jafnvel á milli þeirra? þannig að menn gætu flogið inn með súrálið og burtu með óunnið álið til frekari úrvinnslu erlendis. Rafmagnið yrði áfram á tombóluprís og fengið beinlínutengt frá OR.

Lagt var til að Reykvíkingar nýttu sér s.k. íbúalýðræði í ákvörðunarferlinu sem felst fyrst og fremst í rándýrri "charming offensiv" misvirts alþjóðlegs fyrirtækis gegn fjölda venjulegs fólks sem þykir vænt um umhverfi sitt en á ekki fjármagn til þess að standa í skaki við alþjóðlegt stórfyrirtæki.

Góð lausn !- úff - mengandi stóriðja inni í miðjum bæjum og borgum! - Springfield Homers Simpsonar orðin íslenskur raunveruleiki? Er það eitthvað til að stefna að?

Teiknimyndin um drykkfelda jólsveininn

Af vefnum 
Working on driving the world slightly insane.

Það þarf ekki að fara mörgum orðum um það hvað börn hafa gaman af teiknimyndum. Núna í aðdraganda jólanna þykir Ölgerð Egils Skallagrímsonar, m.a. í nánu og innilegu samstarfi við markaðsdeild RÚV ohf og yfirmenn þessa fyrirtækis allra landsmanna, við hæfi að bjóða börnum upp á teiknimynd.

Að vísu sama teiknimyndin sýnd ítrekað fyrir og eftir og jafnvel inni í þáttum . En teiknimyndin fjallar í stuttu máli um drykkfeldan jólasvein sem á sleða sínum er á leið til að sinna mikilvægum störfum sínum í aðdraganda jólanna. Á ferð sinni mætir hann vöruflutningabifreið sem er full af áfengi. Í stað þess að halda áfram sem leið liggur til hefðbundinna jólasveinastarfa þá snýr sveinki sér tafarlaust við og eltir áfengið með þeim hætti sem einungis langt gengnir alkahólistar myndu gera. Ekki veit ég hvað síðan á sér stað en tel einsýnt að sveinki eigi erfitt að með að sinna skyldum sínum þetta kvöld þéttkenndur eða augafullur eftir drykkju á áfenginu eftirsótta ("léttöli sem er ekki til") Þar sem þetta er auðvita teiknimynd og þær eru "ekki alvöru" þá er áfengið það ekki heldur enda stendur afar óljósum stöfum og birtist örskamma stund að sveinki sé einungis á eftir "léttöli". Þetta gera börnin sér auðvitað grein fyrir að mati Ölgerðarinnar og RÚV en það sem verra er að "léttölið" er ekki til og hefur aldrei verið framleitt! en hinn útlenski texti teiknimyndarinnar er um áfengi en það er allt í lagi þar sem börnin skilja ekki dönsku alla vega ekki þau yngstu.

Mér dettur hug sambærileg auglýsingaherferð frá sígarettufyrirtæki sem bjó til alveg einstaklega geðþekka teiknimyndapersónu, úr merki fyrirtækisins, úlfalda nokkurn sem þau kölluðu að mig minnir Joe. Blessuðum börnunum fannst mikið til mannkosta Joe koma og auðvita gátu sígrettupakkar með mynd af honum í huga barnsins ekki verið neitt annað en eitthvað jákvætt og gott. Teiknimyndaþættirnir voru sýndir í barnatímum víða í Bandaríkunum. Báru vott um sorglega lágt siðferðisplan þar sem í engu var svifist í markaðsátaki og engu skeytt um annað en að selja sem mest.

Ölgerð Egils Skallgrímasonar hefur nokkra dóma á bakinu vegna brota á réttindum barna til að vera laus við áfengisauglýsingar. Það er einungis tímaspursmál hvenær "Sjónvarp allra landsmanna" RÚV ohf lendir í þessum vafasama félagsskap. Teiknimyndir um drykkfeldan jólasvein eða um úlfaldann Joe sem liður í auglýsingaherferð sem sérstaklega snýr að börnum er fullkomin lágkúra. Viðskiptasiðferði ef siðferði skyldi kalla af þessum toga er þessum aðilum til skammar. Að Rúv ohf skuli taka þátt í þessu er með ólíkindum og algerlega ljóst að það er ekki með fulltingi 317.829 eigenda þess. Á maður að eiga viðskipti við fyrirtæki sem starfa á svona lágu plani, Skilja stjórnendur RÚV ohf ekki ábyrgð sína í samfélaginu og er ekki réttast að koma RÚV út af auglýsingamarkaði a.m.k. meðan að svo er.

Bréfaskóli Hannesar Hólmsteins

„Vonandi missir Samfylkingin a.m.k. 2 menn í næstu bæjarstjórnarkosningum. Þannig öðlast Hafnfirðingar von um að einveldi Lúðvíks (og Gunnars) ljúki og "lýðræði komist aftur á að nýju" í Hafnarfirði. “ segir Sigurlaug Anna Jóhannsdóttir stjórnmálafræðingur formaður Fram, sjálfstæðisfélags Hafnarfjarðar á bloggi sínu.

Spurt er: Er það bara kallað lýðræði þegar að sjálfstæðisflokkurinn nær meirihluta í kosningum. Ef meirihluti Hafnfirðinga kýs annan flokk en íhaldið er það þá einveldi sem á ekkert skylt við lýðræði? Í hvaða stjórnmálafræðibókmenntum finnur maður þessum "vísindum" stað. Er það í bréfaskóla Hannesar Hólmsteins?

Skynsamir unglingar í Hafnarfirði

Hafnfirskir unglingar sýndu frábært frumkvæði í gær þegar að þeir efndu til mótmæla við bæjarskrifstofur Hafnarfjarðar. Æska bæjarins er greinilega orðin langþreytt á eilífum niðurskurði til félagsmiðstöðva og sífellt verri aðstöðu til félagsmiðstöðvastarfseminnar. Þegar að rúmlega 700 ungmenni þramma í mótmælagöngu, halda fund og ræða málefnalega og skýrt um sínar aðstæður þá er það skylda bæjarstjórnar Hafnarfjarðar að taka fullt mark á slíku og ekki síst koma til móts við óskir unga fólksins.

Staðreyndin sú að æskulýðsstarfsemi í Hafnarfirði hefur átt undir högg að sækja í mörg ár og það jafnvel á tímum góðæris. Það hefur því verið eða var að a.m.k. eitt af meginhlutverkum þeirra sem unnu í málflokknum að berjast fyrir tilveru félagsmiðstöðvanna og fjárveitingum til þeirra og því miður oft við lítinn skilning og eða áhuga æðstu embættismanna og einstakra bæjarfulltrúa.

Þær tillögur sem nú liggja fyrir fylltu greinilega mælinn og margt sem olli því. Unglingarnir skynja stöðugt minnkandi þjónustu. Einstakir starfsmenn fengu óformlega að heyra um að þeirra væri ekki vænst í nýju skipulagi. Og svo hitt að fyrirhugað skipulag er arfa vitlaust og gerir ráð fyrir tæplega 25% fækkun starfa í félagsmiðstöðvum þar sem auk þess er gert ráð fyrir "að við aðgerð eins og þessa gefist tækifæri til þess að endurskoða launkjör starfsmanna félagsmiðstöðva"! Samkvæmt reynslu minni af launastefnu Hafnarfjarðarbæjar sem fyrrverandi formaður Starfsmannafélags Hafnarfjaðrarbæjar þá er ekki átt við "upp á við". Grundvallaratriði í þessum skipulagsbreytingum er því að skera verulega niður og minnka þjónustu við æsku bæjarins enn og aftur og umfram annan niðurskurð hjá bæjarfélaginu.

Það er sagt að reynsla tilraunverkefnis í Áslandinu hafi gefið góða raun? og slík staðhæfing gerð að aðalatriði sem ástæða fyrir skipulagsbreytingum. Spurt er hefur einhver fagleg úttekt farið fram á því? Veit sem er að forstöðumaður Ássins er afar góður starfsmaður og ferst flest vel úr hendi algerlega óháð einhverri skipulagslegri umgjörð. Á því hvort vel hefur til tekist eða ekki er ekki annað en eitthvert einka mat embættismanna sem er fjarri því ígrundað eða faglegt, einhverjar tvær þrjár línur í einhverri greinargerð þess efnis hafa einfaldlega ekkert faglegt gildi.

Hvað sem menn kunna að segja í umræðunni m.a. í bæjarstjórn þá er margt undarlegt í þessu máli. Fyrirmynd skipulagsbreytinga er sögð koma frá Reykjavík ? og Kópavogi? Hafnarfjörður er ekki þrisvar sinnum stærri en Grafarvogurinn og skiplag mála í Kópavogi hefur ekki þótt til eftirbreytni.

Skipurit hins nýja skipulags sýnir einfaldlega að fækka á forstöðumönnum um helming og setja í stað þeirra ódýrari starfskrafta á gólfið og með því draga úr afleiðingum hins mikla niðurskurðar. Á skrifstofu ÍTH munu því væntanlega bætast við þrír skrifstofumenn og síðan er óljóst hvað verður um ágætan rekstrarstjóra ÍTH. Með þessu verður yfirbyggingin því orðin veruleg

Í þessum hugmyndum um skipulagsbreytingar er ekki stafur um fagleg málefni? En ljóst að starfseminna á að byggja á "ódýrari" starfsmönnum sem þýðir á mannamáli að ekki verða gerðar neinar teljandi kröfur um menntun. Horfið er til baka til "samræmis" við frístundheimili þar sem litlar sem engar kröfur hafa verið gerðar um fagmenntun og eiga langt í það að ná félagsmiðstöðvum. Fagfólkið þeir fáu sem verða eftir verður skrifstofumannskapur langt frá vettvangi.

Faglegur standard í félagsmiðstöðvum í Hafnarfirði verður með þeim hætti að nemar í tómstunda- og félagsmálafræði í Háskóla Íslands geta ekki sótt vettvangsnám sitt til Hafnarfjarðar þar sem starfsmenn munu ekki uppfylla lágmarksskilyrði til þess að taka að sér nema. Þá má því miður segja að hugtakið faglegur metnaður sé fjarri í þessum skipulagslagsbreytingum sem auk þess eru sennilega unnar án nokkurs samráðs við það ágæta fagfólk sem (ennþá) vinnur hjá ÍTH.

Starfsaðferðir unglingalýðræðis hafa lengi verið við lýði í starfsemi félagsmiðstöðva í Hafnarfirði, í því starf felst hvatning til unga fólksins til virkar þátttöku, ábyrgðar og frumkvæðis í starfi og leik. Með því auka ungmennin félagslega hæfni sína sem er ákaflega góð "menntun" í nútímasamfélagi og ekki síðri en hin formlega menntun skólakerfisins. Með virkri afstöðu sinni gegn óhóflega miklum niðurskurði til félagsmiðstöðva og skerðingar á þeirri starfsemi sýnir unga fólki í verki hug sinn til þessara mála enda finna þau á eigin skinni hverning þjónustan er sífellt skorin niður. Þessu frumkvæði unga fólksins ber að fagna að taka fyllsta mark á.

Sjá ennfremur:
Unglingalýðræði
Börn, unglingar og þjóðfélagsumrót